Pola: 15 agosto 1946

Sora la Rena xe scura la conca 

d’un tempestado cel de tante stele.

Dentro, fra i archi, lampadine e fari 

rompi la note; i forma scherzi d’ombre 

mentre sul mar, nel porto, qualche lume 

fa slusigar legera la mareta 

che, pianin, mormora contro la riva.

Quindici agosto festa de Maria 

festa de Pola in agonia.

Mai ne la Rena tanta gente insieme, 

tanta gente che pensa a un modo solo, 

mai tanta gente drio a l’inferiade,

un sora l’altro, done, muli e veci.

Gira i « cerini » intorno tuti atenti; 

fra i oleandri i guarda e fra le graie,

soto le scalinade e soto ’l palco...

Gnente paura! I « drusi » stà lontani

In Rena, ogi, solo Italiani!

Dopo i ginasti presentadi a turno,

mule e ragazi, dal maestro Urbani, 

vien avanti sul palco un coro misto.

El glorioso nostro coro « Ciscuti ».

In ogni cor za palpita le note 

dei veci e novi canti polesani 

col « Nabucco », i « Lombardi » e l’Inno a l’Istria. 

Sentimo tuti ’na vose che ciama...

xe l’Italia, la nostra Marna.

E ... «Va pensiero su l’ali dorate »... 

i coristi singioza a gola streta...

Italia!... Italia!...rispondi la fola, 

sventolando bandiere tricolori.

Tuti xe in piè: chi piansi, chi prega, 

chi se basa, chi ridi, chi stà zito, 

col sguardo perso lontan ne la note.

Italia!... Italia!... el zigo se ripeti 

urlà da mile e mile peti!

Un camerier tremando se vicina:

« Che bel che xe... che comovente tuto »...

cussi ’l me disi e, mentre ’l parla, grossi 

lagrimoni ghe casca zo dai oci.

Tuto ’l popolo canta... canta Pola 

con le note sfogante ’l dolor suo, 

palesando l’amor per la su’ Patria.

O siori Inglesi, siori Americani: 

coss’ ve par? Semo Italiani?

L’ino del Piave se sperdi per l’aria, 

acompagnando ’l popolo che sfola.

Le lampadine se studa d’un colpo... 

resta sola la Rena ne la note.

Sola, pensando che fra pochi mesi 

l’ofer darà le lagne dei sc’iavoni

cantando a Tito e spapuzando ’l «kolo ». 

Canta ancora la gente da per tuto 

...fra tre giorni pianti e luto...