El tormento dell'esule polesan

Lontan mi son de ti, Pola mia cara,

ma te go sempre qua in fondo al cor;

la via dell'esilio la xe amara,

piena de delusion e de dolor.

Mi penso a la tua gente disperada,

dispersa, che se rosiga el servel;

e tuta 'sta disgrassia capitada

che a mi me ga privà del tuo bel cel.

Mi vedo le tue grote, le pinete,

speciarse nel celeste tuo bel mar,

i porti, le campagne, le rivete

che mi no podarò dismentigar.

Mi sento l'aria limpida, salada

coi rèfoli de bora o de garbin:

me vegnaria de farte una cantada,

ma no go più né voia, né morbin.

Mi iero e son de ti inamorado

te go volù, te voio tanto ben;

co penso a quel che a noi ne ga tocado

go un groppo in gola e un sbrusighin nel sen.

Son polesan patoco e me ne vanto;

son greso, s'ceto, fiero, materan;

de ciacole bugiarde no m'incanto

e fin che moro restarò italian.

Sergio Zuccoli